孖啡 (已結業)

樓上cafe 非常多，之前食過有啲質素強差人意，今次去到孖啡，食完感覺食物絕對對得住個價錢，係性價比之選。雖然孖啡係樓上cafe，但位置處於旺角同油麻地站中間, 交通相當方便。身為一個大食既為食貓/豬(?) 緊係落個order 食肉，一睇到menu 二話不說即刻叫左份BBQ 烤豬仔骨配薯條($158)。原本只係諗住佢4-5條骨。一黎到係double ，無睇錯，係一倍份量既豬仔骨。豬仔骨份量完全可以多人分享，但對我黎講就岩岩好！份豬仔骨咬落爽口，BBQ醬味完全唔會覆蓋住豬肉既味道。表面仲有小小焦脆香，岩哂食肉獸們開餐！！！之後再order 一杯非常值得夏天飲既開胃飲品，塔羅特飲-審判（青蘋果，菠蘿，薄荷，檸檬沙冰）($52)一飲落口，先由青蘋果打頭陣衝入味蕾，再而薄荷接棒，之後由菠蘿帶出甜味，再由檸檬收尾。一杯沙冰由不同食材帶出四重奏刺激味蕾，非常推薦各位小朋友飲下。