濠客蒸氣海鮮 (已結業)

今日係母親節，一早係OpenRice book 咗7點半 4位。當去到時候，已經覺得心知不妙，好多人係門外等位🧐但當我同負責人確認嘅時候，佢已經唔係好得閒理你啦，因為真係full house又忙住幫人蒸嘢食。到佢得閒嘅時候，問佢我哋book咗位，係OpenRice book嘅，佢無確認我個booking，只係話要等等，再問多句：「咁我book咗枱，要等幾耐/幾張枱呢？」佢一臉煩厭同語氣帶點差咁回覆：「唔知架！你睇下呢度都坐咗幾個（指住隔離坐喺門口等緊位嘅人）！你可以選擇唔等！！！真係爆棚搞唔掂」之後又衝咗入去。於是我同家人立即離開搵第二間去慶祝母親節。呢啲服務態度真係差！咩叫你可以選擇唔等！其實佢可以係cut booing，唔接walk in，又或者將walk in 減少！無咁大個頭，就唔好戴咁大頂帽。無咁多位，就唔好接咁多booking。今晚等位嘅人應該都等到燥，事關今晚又熱，加上佢又成日開住到門，冷氣走晒加上又多蒸氣，食都食得唔舒服，今晚如果等到都慘。呢篇係我第一篇嘅OpenRice 食評。今晚好彩家人唔介意，塞翁失馬焉知非福，最後去咗間黃店幫襯。