平時行過門口都會見到老闆娘笑容滿面拉客,好多時食緊嘢,有d第一次嚟嘅客人入嚟,老闆娘都會好有心機介紹有咩好食!走嗰時又會依然都會笑容滿面講多謝!講真有時一間鋪頭就算d嘢好食,但係你見到伙計黑口黑面,你都唔開胃啦!
講咗咁耐,講正題,就係食物,我記得第一次我係食”台式肉醬撈飯”,依個飯我食完一次,基本上之後嗰10次都係食依個飯,d肉醬唔會好咸,仲有菜譜,再加d青瓜中和返!而且個飯都係賣$28,老實,我喺同區茶餐廳真係食唔到依個價囉!
第二樣,係佢d魚湯泡飯,可能你會話”車”,咪又係湯飯,冇錯的而且確,只係一個湯飯,但係佢個魚湯絕對冇味精,而且好味,係真係會飲曬佢d湯為止!佢有雞柳,牛肉等選擇加埋d翠玉瓜同紅蘿蔔,唔會話淨係得肉,顏色又靚! 佢仲有魚湯浸菜,一樣咁好味^^
另外, 就係我男友最鍾意嘅五味汁,佢都係有魚,雞嘅選擇,好似仲有牛,不過我同我男友比較少喺度食牛!佢個汁酸酸甜甜,但你唔好以為佢係咕嚕肉咁嘅味,絕對係唔同的!依個你一定要自己試先知!
有一次我食食吓飯聽到有個客講個個咖哩雞好食,所以叫咗,我聞都覺得好香,所以叫男友下次叫嚟試下,結果真係好食,不過對於我唔食辣嘅人嚟講,就辣咗d,我男友食得辣就話好好食!
近來因為我減肥戒澱粉,有時我會叫客檬汁雞奕,開頭以為只係得檬味,老闆仲喺個自制汁入面加洋蔥!!即刻唔同曬!又開胃,可惜我減肥中唔食得飯!!!哈哈~依個送飯一流!
有次我男友仲叫咗個香矛豬扒,d香矛係老闆自己整,加埋d蔥,好香唔係出面食到嘅香矛咁嘅味!
昨日我同我男友仲試埋個芝士撈叮同胡椒豬手飯,芝士的味係比尖沙咀淡一d,但係都好好味喎!雞奕充滿肉汁,無得頂!
胡椒豬手飯,個湯夠濃,豬手夠'林",掂,依家凍咗,食完個人都暖d!
暫時嚟講,我喺度試過嘅都冇令我失望過,起碼唔會好似有時食飯食到d30-40蚊勁難食嘅飯咁.
而且老闆好肯改良每樣嘢,好似個湯飯,前排食開覺得有唔同,好食咗,再留心d睇,我問老闆係唔係加咗冬菜,老闆話係!好似依排凍咗,老闆話怕撈飯入面嘅青瓜雪得凍改用菜代替,一同佢講冇咁好食,佢都改返用青瓜,老闆仲時不時會問我哋覺得d嘢點?由此可以睇得出,老闆係好有心機.而且老闆仲係一個好風趣嘅人,成日同我哋傾計!
唯一一樣美中不足,就係間鋪嘅地點,唔係喺埃華街,大全街依d旺街,所以唔係咁就腳同少人!但係我覺得”輕鬆小城”絕對拍得住依兩條街嘅餐廳咖!
