阿四車仔麵 (已結業)

有時想食車仔麵，但係坐得唔舒服，天氣好熱，就唔想食。但係旺角呢間車仔麵，環境夠闊落，而且坐得舒適。呢度嘅車仔麵$38已經有三個餸，非常抵食。旺區來講真係好抵。我就比較貪心啲，所以叫咗四個餸。揀咗辣魚蛋、豬紅、魚皮餃及炸墨魚卷。湯底揀咗咖喱汁，麵類我揀咗米線。車仔麵質素唔錯，最鍾意個湯底咖喱汁夠香濃，而且米線煮得剛剛好。豬紅份量都幾多，辣魚蛋夠入味，係較大粒魚蛋。魚皮餃都幾好食。最鍾意食炸墨魚卷，夠彈牙，仲有墨魚粒。另外叫咗小食，係瑞士雞翼。夠入味，我覺得瑞士汁較為甜。飲品叫咗樽仔奶茶，奶茶係港式奶茶。好好飲，茶味濃。