同事生日, 香港九龍新界都有所以都係喺翻尖沙咀最中間。
呢個又話唔食壽司, 一個又唔食扒, 又有人唔食辣, 最好食中餐! 美麗華對面夠晒方便, 而且酒店酒樓應該唔會太差掛…
咦?原來係whisk樓下, 不過啲波波令樓底睇落好低,呢個一波兩用嘅設計出咗少少錯。
綜合各位意見我哋叫咗最簡單嘅嘢, 塞螃蟹, 半隻燒雞, 翠玉瓜抄瘦肉, 炒咗碟菜,幾個白飯。
塞螃蟹有好多好多帶子, 帶子都好新鮮, 滑而且彈牙, 蛋白好實在唔會散晒, 好濃嘅蛋白味道, 下面有脆底似乎師傅想增加口感層次, 好好食呢個塞螃蟹, 但蟹子有少少多此一舉。
燒雞皮普通脆, 雞味道亦普通, 麻麻哋。
翠玉瓜抄瘦肉抄得夠鍋氣, 翠玉瓜入口爽而且甜, 瘦肉剛熟唔韌, 雲耳比較軟腍, 成碟菜剛剛好有足夠油包住但又唔會油膩到漏到碟邊, 非常好。
個菜就鹹咗啲, 無白飯一定會太鹹。
最值得扣分有兩個位, 一就係白飯, 好多酒樓而家都會裝飯裝到圓碌碌, 而呢間酒店酒樓就求其咗啲,似住家飯。另外就係服務, 因為我哋講嘢大聲但我覺得男waiter嘅眼神有啲唔禮貌, 其他waiter, waitress都好好。
總結翻, Cuisine Cuisine味道方面無乜驚喜, 但比較嚟講就算經濟, 環境非常乾淨, 服務態度可以(我相信是個別問題), 應該比good。
