六合小廚 (已結業)

有個外地朋友嚟咗香港探我， 去尖沙咀玩咗一日之後佢話想食啲有香港特色嘅嘢，咁我梗係即時諗起避風塘炒蟹嗰啲啦。 搵到呢一間餐廳好似專門係食蟹嘅， 而且又近我哋行街嘅地方，所以我哋就上咗去啦。 要嘢食嗰陣我哋發現今日啲蟹賣曬，就唯有轉食炒辣蝦。 我哋仲叫咗個雪菜炒四季豆，另外仲叫咗半隻霸王雞。 雖然冇得食炒蟹，但係炒香辣蝦我都係第一次食，因為平時都係食開黃金蝦椒鹽蝦之類。 香辣蝦下面用牙菜墊住，過做法有啲似四川菜， 食落我朋友就覺得太辣但係我都叫做食得辣所以我覺得啱啱好。 炒四季豆就住得比較特別啲，有少少甜甜地嘅味道。霸王雞個味道比白切雞濃少少，食落個雞嘅質地唔會太老，分量亦都足夠。 另外我哋每人都叫咗杯嘢飲，佢哋叫咗紅豆冰我就要咗一杯蜂蜜柑桔。因為紅豆冰真係香港茶餐廳嘅特色嚟嘅，我建議如果怕辣嘅人呢都可以要杯紅豆冰用嚟解辣。我杯柑桔蜜唔會太甜，飲落都幾消暑。食食下朋友先至話想試下食車仔麵， 不過我哋已經食得好飽所以冇叫到。雖然個價錢有少少貴，但係坐落都幾闊落冷氣又夠凍，而且啲嘢食嘅份量都好足夠，有外地朋友呢都推薦可以帶佢去食。