上海婆婆336 (iSQUARE國際廣場)

营业中

休息中

一直好鍾意食上海菜嘅我，周不時會嚟尖沙咀依間「上海婆婆336」食晚飯，不論係小食、主菜、主食定還是甜品都有好多選擇，而且都幾好味。*此餐廳收取加一服務費。黑醋排骨（單點$88），表面裹滿黑醋醬汁，排骨肉質軟腍、帶有軟骨，味道酸甜，配菜包括有紫洋蔥。乾煸四季豆（單點$78），肉鬆蒜蓉炒四季豆，口感爽脆，食落好香口。北京炸醬麵（單點$65），炸醬採用五花肉丁、乾黃醬、鮮黃醬、甜麵醬製作，肥瘦比例適中，食落好入味，味道鹹香，麵條口感幼滑，容易掛汁，配菜包括有青瓜，雞湯飲落有鮮味。336上海小籠包（單點$46），皮薄餡多，豬肉餡料內有肥膏、肉筋，食落肉味濃厚，小籠包食落入口爆汁，配以薑絲浙江香醋食用，味道更佳。南瓜餅（單點$42），表面鋪有椰絲，南瓜餅口感煙韌，味道香甜，內有紅豆泥，口感綿密。芝麻糊芋圓（單點$28），地瓜圓、紫薯圓口感Q彈，唔，內有地瓜、紫薯餡料，味道清甜，略嫌芝麻糊口感稀薄、芝麻味道比較清淡。茶水（兩人$12），茶味濃香。