武士拉麵 (已結業)

今日係我同老婆結婚3.5週年紀念日，係天文台道附近飲左杯野，見肚餓又想唔想食飯同西餐，咁就比我撞正呢間武士拉麵。佢既門面唔係太起眼，只有一塊紅色招牌寫住武士拉麵。入到鋪頭裡面，其實真係幾細間，全店只有8個位，所以唔係咁容易成日有位。全店面都夾返佢既主題「武士」。等左大約5分鐘，拉麵終於到！呢次食既係「德川將軍拉麵」同埋「織田將軍拉麵」，其實即係鹽味同醬油味拉麵。對於食拉麵都有好幾年日子既我，其實對於個湯底都感到驚喜。佢係屬於濃味果一邊，但濃得黎唔會膩。佢既叉燒製法都幾特別，麵質呢次我揀左超硬，亦都爽口！溏心蛋，絕對值得追加！超級正！泊得住日本在地水準！不過美中不足既就係，個湯底唔夠熱。基本上個麵一上，極速影左兩張相已經起動。不過都只係感到微暖，食得慢少少個湯都可能會「鯨」。如果可以上麵時個湯底熱返少少，應該整體會更佳。最後，令我最估唔到既就係，佢居然有做學生餐優惠！通常呢類算係高質既拉麵店，一定唔會做呢 D 優惠。呢間連學生都考慮到，算係非常既良心小店，值得一讚！