三分俗氣 (已結業)

今日熱屎辣辣，流咗勁多汗，個人都冇咩能量，所以一收工即刻同個同事去附近搵嘢食～由於太肚餓，所以我地兩個女人仔都決定要食啲飽肚嘢嚟填下肚！行下行下就嚟咗依間「三分俗氣」～大家見到係上海嘢都二話不說入去坐，再二話不說咁一人一杯凍豆漿！餐牌勁多嘢可以點，最後我地揀咗幾樣嘢「些牙」食～首先嚟個冷盤小食雞絲粉皮，份量唔錯，啱兩個人一齊食。味道同出面正宗上海菜一樣，而且花生醬份量適中，唔會太濃味。之後就有個茄子燒魚塊。啲魚塊大大舊，好有口感，同茄子一齊煮，味道好夾，始終中菜口味係啱香港人食！跟住就有個蔥爆羊肉配薄餅。平時食上海菜最喜歡叫蔥爆xx,今次都唔例外，味道係水準之上，配埋個「片皮鴨」專用嘅薄皮，真係幾match！最後仲叫多個自家制樟茶鴨。係鴨脾嚟架！好正！而個鴨肉煮得好乾肉，一啲都唔油膩，點落啲醬汁到非常好味！而伴碟仲有幾個包仔，用嚟夾埋鴨肉食真係一流！估唔到平時返工放工有間咁正嘅上海菜，睇嚟之後啲公司gathering dinner唔使再煩去邊食嚕！