東園快餐 (已結業)

快步行過博文街，見到喺兩間食店之間，有一處共用的冇冷氣「黑暗空間」，開咗幾張枱，唔少人在食碟頭飯、吹水或者扯煙，明顯同周圍的正常食肆格格不入，睇得見巿井地踎味濃到不得了。舖頭內外貼滿餐牌，當牆紙咁用，夠晒特式，超鍾意下快快手揾位坐好叫飯。午餐韭黃滑蛋蝦仁飯同叉燒炒蛋飯，賣相靚。蝦肉冇「梅」，冇雪藏味，唔係得蝦毛幾隻，蛋炒得滑，鼓油鹹度適中，成碟飯份量足，性價比高。叉蛋飯用料同樣多，只係自己唔太好食肉，覺得叉燒較肥。現場所見，男士多數都係食叉蛋飯。餐飲可以揀餐湯或熱飲，餐湯係自助形式，行去「黑暗空間」埋邊，打開個大煲自取就得。奶茶用不鏽鋼杯載住，感覺上用厚身奶茶杯會更加好，會覺得好飲啲。茶夠熱，味亦濃，可惜欠茶香。坐喺店內用餐，有都巿閒情送飯；坐喺外面的「黑暗空間」，就可以望吓街，吹吹風。返工要長時間坐喺寫字樓，難得呢個鐘可以喺呢個地踎環境叉吓電，個人都輕鬆好多。