AL Coffee & Bar (已結業)

星期六入咗荃湾陪朋友行街，因为较少入呢区所以都专登揾左间Cafe去下，体验下荃湾区嘅慢活生活。钟意去Cafe影相嘅我，拣咗呢间AL Coffee见佢系新餐厅 应该人流比较少， 可以方便打卡影相！去到估唔到个环境又几舒适，咁岩窗口边张梳化有位，劲开心，因为见呢个位影相最靓。阳光+落地玻璃，透出自然日光，真系好靓！食物方面我地叫左Pancake同埋Waffles 饮品就叫咗Espresso Tonic 同Latte。Pancake 卖相非常精美，附上一杯健康乳酪，我地拣咗枫糖酱。Pancake蛋香十足，面头仲铺上好多生果，有齐士多啤梨、蓝莓、香蕉，加埋枫糖浆，好丰富，见到都开心！仲有Waffle我地拣左朱古力酱，同样有多款生果铺面，配埋旁边嘅忌廉食，邪恶得嚟又令人好满足！食埋佢嘅乳酪，balance 返个甜度，真心唔错架。饮品方面我嘅Latte奶味几香，又饮到咖啡嘅浓郁，坐喺梳化望住玻璃，再饮啖咖啡，好休闲的感觉。朋友嘅Expresso Tonic都唔错，夏天饮好正，啖啖咖啡香，一试难忘！