之前反覆響度諗:啊！今日係最後一日在港,之後返洛城,對於我黎講,今日之後,唔知最後幾時可以返黎香港?究竟係咪要食豪一D呢?我又唔想食大家樂、大快活咁平平無奇,了無新意.其實反覆去想,差一盅兩件未試過....好!就去飲茶吧.
因為呢次我住曉麗苑,所以去飲茶,一下落去觀塘市中心,其實我又唔想搭車出去.近近地,睇Openrice食評,秀茂坪商場有一間酒樓,就近近地,去呢間飲囉,反正搭電梯就到.
其實又唔難搵既,就響商場二樓,隔離係惠康超市.但因為早上八、九點飲茶,會有好多公公婆婆去飲茶.不過香港興搭枱文化,我就座無耐,就有一對公公婆婆坐我同一張枱,反正一支公去飲茶,無所謂.
同十幾二十年比較,係咪時代不同呢?而家叫點心先響點心紙上剔上心愛點心,再點心阿姐拎過黎.我反而鐘意推車仔年代,因為比較似飲茶,熱鬧嘛.在洛杉磯,至今去飲茶仍保留呢種傳統,但香港仍舊用竹籠裝點心,幾十年不變;相反洛城已改用鐵籠裝點心,可能當地政策係咁.
一個人,叫咗五樣點心食....似乎有點過態.
蝦餃係必然要點既,始終唔夠大粒,但還算爽口既,都OK啦...
魚餅反而我幾鐘意食,新鮮剛炸,熱辣辣,有魚既味道.
香茜牛肉腸粉
K既,如果D腸粉皮再韌番少少就Prefect.
蘿蔔金錢肚:都幾好食,佢有用咖喱汁,咖喱辣D都幾好食.
皮蛋瘦肉粥:係不過不失既.
埋單收88蚊,折合約11-12美金左右.始終香港一盅兩件比起洛城以致三藩市平,雖然近年香港食材貴,快餐店加價,但比起美國而言,呢個價錢約食到當地三籠蝦餃(以一籠2.15美元計),會較划算.不過美國份量較多,亦不過不失,各有千秋既.
