::: 白汁野菌雜錦腸意粉 + 凍咖啡 ::: $58
隨餐附送是日餐湯, 今日係忌廉蘑菇湯~ 感覺上似係罐頭湯底, 再溝番d蘑菇茸入去咁. 忌廉味清淡, 滲出淡淡嘅蘑菇味. 整體味道偏淡, 不過勝在質地夠杰.
雜錦腸有司華力腸、芝士腸、白豬肉腸幾種腸仔切片, 菇嘅份量唔算多. 意粉個白汁味道同是日餐湯十分相似, 不過味道都係偏淡, 好在d腸仔夠鹹先突出番個味~ 面頭有半片車厘茄同一片烤得頗乾嘅翠玉瓜, 但都係無乜味嘅… 意粉煮得較淋, 不過撈埋d汁食都ok~ 整體係好屋企風味嘅意粉~
凍咖啡唔錯! 夠香夠濃帶少少澀味, 好好嗒~ 係可以用嚟嘆嘅咖啡!
::: 白菌忌廉汁龍俐柳天使麵 + 凍檸茶 ::: $68
其實個白菌忌廉汁又係美其名, 到頭來咪同個白汁一模一樣… 又有件車厘茄同翠玉瓜, 即係除咗塊龍俐之外就同個雜錦腸意粉冇分別…龍俐柳有2件, 份量都幾多, 味道夠鹹, 可以帶出番意粉同個汁嘅味道~
凍檸茶夠晒港式茶餐廳feel, 檸檬都夠鮮, 又夠凍, 正!
::: 蒜茸包 ::: $12
跟餐加$12先有~ 不過一客有5件, 每件平均過半吋厚, 蒜茸牛油搽得均勻, 焗完又香又鬆化! 抵呀~
::: 紐約芝士餅 ::: $22
食飽飽後再散叫咗件cake~ 雖然呢個new york cheesecake唔算好正宗, 但佢個質地夠晒濕潤細密, 口感軟綿綿~ 芝士味清香不膩, 最重要面頭層cream夠薄, 唔會太heavy, 如果餅得做得實d更佳!
呢度不論環境、食物、服務都好有住家feel! 雖然唔算得上好高質素, 但坐得好舒服, 食得夠寫意~ 一邊食野一邊睇書睇雜誌, 悠悠閒咁又過咗一個下午~ 好嘆呀!
1
1
1
