燃 (已結業)

今晚去大圍食飯，原來呢度附近好多小店，質素都唔錯！我哋鍾意食刺身，點咗六點刺身盛，刺身全部都係厚切，份量慷慨。三文魚腩同油甘魚都好肥美，帶子厚肉有鮮味👍🏻 三隻牡丹蝦隻隻都好新鮮！食完凍嘢又想食熱嘢，鮭魚石狩鍋大大兜，上枱香噴噴。鮭魚石狩鍋裏面有好多材料，除咗有煎香左嘅三文魚，仲有好多豆腐、皇帝菜、菇等等。呢個湯好好飲，如果加個烏冬煮都唔錯。之後仲食咗雞皮餃子，熱辣辣，雞皮炸得香脆，入面係肉餡都幾好味，送啤酒一流。見到呢度嘅午市套餐經濟實惠，下次要試吓。