土炮懷舊特飲 (已結業)

呢個鋪位之前係一間我幾鐘意嘅熱狗店，早前換上新面貌，接手嘅係一間飲品店。鋪位以紅白藍設計，收銀處掛有手撕日曆、打字機等懷舊代表，不過當中最有本土特色都係店面紅底白字嘅手寫餐牌。台式飲品店、芝士、奶蓋雖然成行成市，但喺屯市其實都係得間貢茶，所以土炮懷舊特飲喺位置上並非輸蝕。飲品店主打懷舊特飲，例如黑牛、雪糕紅豆冰、涼粉冰、薄荷賓治、鹹檸柒等；要喺平平無奇嘅飲品展現小心思，唯有從名字入手，例如K房雜果賓治、鹹檸檬檬食甜筒、士多啤梨蘋果橙梳打都有陣港式飲品味，定價$19-24。不過講到底，齋做飲品之路艱難，所以小店都供應唔少土炮小食，蝦醬雞翼、炸雞皮、炸鰻頭、魚蛋燒賣等，$10- 25。綠豆冰 $19紅豆、綠豆係自家製，特別係杯蓋位置開左個大咕窿，可以直接用匙更食到綠豆，簡單黎講就係可以一路行一路飲嘅綠豆冰。綠豆份量佔幾乎一半，幾有咬口，上層係較稀身嘅奶，比起台式飲品嘅死甜，或者都係土炮飲品解渴。冰用原粒，而且份量都幾多，不過我地怕熱就冇乜所謂。廿蚊唔洗，當支持下小店乜乜，唔洗下下幫襯貢茶7仔囉。