影片
更多
2013-05-19
36 浏览
自從有咗團購，對食肆嘅投訴就多咗好多好多，貨不對辦，將貨就價，供貨不足，條款苛刻……呃人搵笨之聲此起彼落。無可否認，有啲奸商真喺藉團購搵著數，貨不對辦嗰啲就唔在講，最常見就晌個團購度抬高個原價，跟住個團購價就大折讓，好似好平，查實跟店方平時其他優惠差唔多。北海道牧場餐廳一向以「嚴選日本進口材料」及「用上招牌3.6牛乳製作」為綽頭，自然吸引唔少3.6牛乳粉絲，不過，今次晌度享用嘅團購就唔喺有咩不快事，無中伏，無投訴，個團購仲喺超晒值。未講食，先講講故仔。事緣依個團購「$38 北海道牧場餐廳二人餐 (價值 $88)」晌一月尾推出，一推出已非常熱買，小弟晌1月31日都買番一套睇門口，一來因為「北海道牧場」未試過，又見好評不少；二來兩個餐夾埋先收你$38，無其他雜費再收，實在吸引力好大；再者，幾間分店都用得，唔使一買就要揀指定分店，好大彈性，豈可錯過。不過使用細則確喺有點點「要求」（從網站照抄 http://www.groupon.hk/deals/hongkong/Hokkaido-Dairy-Farm-Restaurant/716708303）：•優惠券由2013年1月31日至2013年4
未講食，先講講故仔。事緣依個團購「$38 北海道牧場餐廳二人餐 (價值 $88)」晌一月尾推出，一推出已非常熱買，小弟晌1月31日都買番一套睇門口，一來因為「北海道牧場」未試過，又見好評不少；二來兩個餐夾埋先收你$38，無其他雜費再收，實在吸引力好大；再者，幾間分店都用得，唔使一買就要揀指定分店，好大彈性，豈可錯過。不過使用細則確喺有點點「要求」（從網站照抄 http://www.groupon.hk/deals/hongkong/Hokkaido-Dairy-Farm-Restaurant/716708303）：
•優惠券由2013年1月31日至2013年4月30日有效
•星期一至日 3pm 後堂食或外賣適用
•套餐外賣另加 $4
•每日供應數量有限，先到先得
•最後落單時間為關門前30分鐘
但喺，2月5日已收到團購網站嘅電郵：「由於今次優惠反應非常熱烈，為保持一貫優良的食物品質給我們尊貴的客戶，餐廳每日將特設獨有的供應數量，先到先得。而優惠劵的兌換日期亦會延長至2013年5月30日。」而且，個團購亦已列明可供選擇嘅套餐只有「A5級日式免治和牛飯」或「頂級厚切餐肉飯」兩款，仲圖文並茂；4間分店嘅營業時間一樣有詳列，尖沙咀店寫明星期一至日8am-7pm（其他分店收9:30pm / 10:00pm），不過，依一點實不相瞞，小弟都走漏眼，第一次6:45pm去到但食唔到（因為最後落單時間喺收鋪前30分鐘），去因為慣性心諗邊有咁早閂門，幸好小弟一向除咗列印張團購券外，仲會印埋啲細則條款，團購個詳細內容出嚟，避免到時有咩誤會。咁長篇大論，想講嘅都喺想話買團購消費者都有責任睇清所有細則，所以話人哋個團購只得兩款套餐選擇，又話人哋因為團購就一早閂門，去到又話買晒……實在有點兒那個，香港嘅投訴文化實在頗嚴重。
第一次到訪摸門釘，第二次再訪晌5月11日傍晚5:00pm，去到人龍唔見，可能好多人仲以為個團購做到4月30日，而且晌入口玻璃門仲見改咗營業時間去到10:00pm，所以如果真喺藉團購呃你錢就唔搞咁多嘢啦。招呼方面亦都唔錯，幾有禮貌，因為小弟要等老婆，掗住個位成十幾廿分鐘，啲店員都無乜唔妥嘅態度，見我枱面乜都無，先間中走咪嚟問我落咗單未，啲嘢食喺咪未到。
入到鋪內，約莫8乘滿，所以有好幾張枱可以隨意揀。尖沙咀店呈長條形，一直入可以入到好深，有個小房仔咁，坐裡面就最靜局，騷擾少，裝潢簡約，氣氛自然。
雖然個團購已定死兩款指定套餐，不過總會好奇佢哋仲有咩好食，所以趁老婆未到翻翻餐牌，又影低啲相留記錄。餐牌A4呎吋底面兩頁，一面喺散叫，包括飲品、三文治、鹹甜小食、麥皮、湯意 / 湯通、忌廉雞湯麵、飯類同燴意粉。另一面則全部都喺套餐，由早餐、三文治餐……‥到飯餐，價錢$29-$44。
厚切餐肉飯套餐（正價$40）如果散叫一客意大利蕃茄炒蛋配厚切餐肉飯都要成$35，加$5變套餐多杯餐飲當然抵好多啦，而今次個團購平均以一個餐計先$19，半價都唔止，抵到無嘢講喇啩。塊餐肉真喺超厚，比平時晌茶記食到嘅厚成一、兩倍之多，近2厘米厚，味道則跟茶記嘅無分別。而餐肉之上配以意大利蕃茄炒蛋，其實只不過喺炒蛋再加啲鮮蕃茄蓉，撤點乾香草啫，個炒蛋表面平平無奇，切開先發現裡面半熟狀態，仲有少少蛋漿，正呀！飯底旁淋上蕃茄汁，不過一睇就知，跟炒蛋上嘅鮮蕃茄蓉喺兩個級別，但整體個飯都仍然唔錯。
餐飲老婆要咗杯熱檸水，原來唔喺一般西檸，而喺半粒鹹檸，唔酸仲帶點鹹，有心思呀！
免治和牛飯套餐（正價$44）一客免治和牛飯配煎蛋賣$39，喺全店所賣最貴嘅飯。免治牛採用鹿兒島A5和牛碎肉加上特別調製嘅醬汁做成，雖然只喺以碎肉做，但做免治都無咩分別，確喺幾好食，幾有牛肉味，可惜免治牛嘅份量唔多，跟團購張相滿到瀉就有頗大落差喇。蛋方面可揀太陽蛋、反蛋、炒蛋，唔出聲就自動俾太陽蛋過你，隻太陽蛋煎得好靚，睇個黃就知隻蛋幾大吓，又煎到半流心，即喺流心得嚟感覺又唔會太生，啱晒我老婆，我就鍾意生啲，所以小弟自己晌屋企煎太陽蛋就一打蛋落平底鑊就即該熄火。飯粒用日本新潟米煮，圓潤有咬口。
餐飲選上北海道咖啡，唔使加錢，轉凍飲、凍華田、北海道3.6鮮奶、太太生薑黑蜜先要加錢。所謂北海道咖啡，原來只喺一般即磨咖啡，不過唔喺落花奶，而喺落北海道3.6牛乳，老實講，咖啡雖然香，但唔覺有好大特別喎，總之揀番落普通花奶，效果可能仲香滑啲。
依餐其實當夜晚飯，因為一陣有小組聚會，只喺較常食早啲啫，事關雖然改晏咗好多先收鋪，但都怕是日團購套餐沽清吖嘛，白行一趟就無謂啦！张贴
