豚道樂 (百合苑商場)

突然之間好想食拉麵，上網睇左幾間，有小小想試下豚道樂，一於早啲去食。夜晚六點左右，鋪頭完全未有人😗可以放心慢慢揀慢慢食，鐘意蒜既我見到特上黑蒜油拉麵($93)諗都唔洗諗就決定要食距，朋友就食特上日本芥末拉麵($93)。

留意返唔揀特上都得，會平13蚊，不過冇溏心蛋、紫菜同少兩片肉(好似係)。

特上黑蒜油拉麵

$93

麵方面我就揀左曲麵，朋友就揀左直麵，曲麵粗啲同真係曲既，直麵就幼啲。硬度我係揀左硬，食落爽口啲，就算浸耐左係湯都冇咁快淋左。問過侍應辣醬唔辣，心思思都係加左，同個湯撈埋真係冇得頂，辣醬既香辣味令黑蒜油既味道好出，搞到我連個湯底都就快飲曬。

特上日本芥末拉麵

$93

至於日本芥末拉麵都幾特別，睇到個湯係綠色以為會伏，點知又幾好飲，唔會好似食壽司個啲wasabi咁攻鼻，配上芝士粉就冇左芥末原有既清淡味，真係值得一試。