澳門仔火鍋串燒專門店 (已結業)

今晚約左幾個朋友仔晚飯，驚旺角太多人，於是喺油麻地站出，轉個彎就見到呢間澳門仔，見門面咁大間，就一於入去試試啦。呢度都幾多款式嘅嘢食，有火鍋，又有串燒，又有小炒，啱晒啲樣樣都想試吓既朋友。叫左個澳門海鮮乳豬豬骨鍋。個鍋一嚟到，嘩，乜咁大個嘅，有蝦啦，有乳豬啦，有花蛤啦，仲有勁多豬骨㖭。啲乳豬雖然一齊浸落啲湯度，雖然會無咁脆，但係會更加入味。蝦都幾爽口，加埋清甜嘅粟米，食到好飽。之後再飲埋啲湯，好夠味，啲材料嘅味道入晒落去。順帶一提，侍應生幫我地換左幾次碟，見我哋啲湯少又主動加水，服務唔錯。之後再叫左原條蒜蓉燒茄子，啲蒜蓉好香，連平時唔多鍾意食茄子嘅我都忍唔住食左好多。話明澳門美食梗係要試個炭燒豬扒包啦。個包好脆，有少少燶，啲豬扒好入味，完全感受到澳門嘅風味。