四點金飯店 (已結業)

今晚去咗新都城四點金飯店買外賣。四點金飯店出名潮州菜。 鹵水鵝 鹵水大腸，鹵水墨魚，鹵水鵝腎，沙茶醬牛肉炒芥蘭， 欖菜肉碎四季豆 ，韭菜豬紅 ，凍烏頭， 方魚肉碎粥，蠔仔肉碎粥，煎蠔餅，煎蝦餅， 凍蟹，鹹菜胡椒豬肚湯，咸檸檬燉鴨湯， 反沙芋，福果芋泥，福果綠豆爽清心丸…………。仲有好多好多，講唔晒今晚我叫咗四個小菜，當然唔少得出名嘅 餸菜啦！鹵水鵝肉拼豬大腸， 鹵水鵝肉夠入味，鵝肉又唔“鞋”肉汁豐富。 鹵水豬大腸洗得夠乾淨冇“壓”味，夠“淋”。 底部有大大件嘅豆腐，起碼有3-4件， 豆腐又滑又入味。沙茶醬牛肉炒芥蘭， 牛肉大大片，大概有10-15片， 而且牛肉又淋又滑又好味， 芥蘭又嫩又爽口。鳳梨梅糕一字骨，酸酸甜甜夠醒胃。一字骨有8件，配上香甜菠蘿，好味到停唔到口。正嘅煎蠔餅，四點金飯店嘅蠔餅，大大件。而且跟其他店嘅唔同。係用煎嘅做法，所以唔會食到一口油，蠔味夠突出，蛋味濃。 仲有一個韭菜豬紅, 徹辣, 入味, 豬紅滑啫啫最後我仲買咗一條綠豆餅，一條有10個，酥皮面， 純綠豆蓉餡，味道剛好，唔會太甜。夠鬆化。戴眼鏡黑衫職員姐姐服務一流, 見佢忙到團團轉, 但跟單冇甩拖.