阿爺粥品手工涮涮鍋 (已結業)

荃灣一向都多嘢食，行街經過見到有一間火鍋粥底店新開張，就入咗去試吓，裝修格局不錯，睇得出抽風設備強勁，一啲煙都見唔到。由於我哋兩個好肚餓嘅關係，入到去就即刻點嘢食，點菜紙得一張，但款式都不少。咁當然首先揀咗個火鍋底先啦，第一次試就揀咗一個有米粥底＄48 。侍應姐姐好快俾咗調味料我哋，有蔥，生蒜，炸蒜頭，芫荽，指天椒，菜脯。個粥底都好快黎到，係已經滾好咗嘅白粥，侍應提醒我哋可以唔需要校太大火唔係嘅話會彈出嚟。滑牛肉＄88 ,牛肉片嘅size都幾大，但係煮的時間要比肥牛耐少少，唔好講笑真係好滑，而且唔會縮水，幾抵食。牛肉丸＄48 ,6粒，用新鮮牛肉打成嘅牛肉丸，同一般出邊食到機打嘅牛肉丸唔同會比較紮實，煮完之後好爽口彈牙，牛肉味夠。聖子＄48只，成隻手掌咁長嘅聖子，爽口有鮮味，沾上豉油吊味仲正。終於煮晒所有嘢食，最後個粥底終於可以試吓啦，因為有肉類同海鮮，個粥底嘅味非常之足夠，如果再加多少少米，咁就更加perfect 。