鮮‧港式串燒吧 (已搬遷) 新店位置

朋友話帶我呢間駱駝漆大廈之中既隱世串燒店，之前都無留意叫咩名，點菜之後發現原來佢叫做鮮，原來係有原因嘅，因為呢間唔止係串燒店咁簡單，而且仲有好多海鮮食，刺身生蠔都有！本身諗住來都係食串燒嘅，但係見到個海鮮拼盤又好似幾抵喎，於是又忍唔住叫咗一個試吓，只不過係＄268，有四隻生蠔兩隻海蝦一堆海螺仲有兩隻大蟶子皇！上咗呢盆海鮮之後，我第一時間梗係試吓隻生蠔先，食完我馬上望住我朋友碌大左對眼，佢問我咩事，係咪好難食？我話唔係，而係我估唔到海鮮拼盤之中嘅生蠔係咁正咁好味嘅，真係好似雪糕咁滑，我冇問到佢係用咗邊種生蠔，我亦都冇咁嘅本事憑外表就判斷得出係邊種生蠔，但真係好滑好creamy，似Gillardeau。個海蝦亦都好鮮甜，蟶子好爽口啊！叫咗一份豬頸肉，$38，都幾夠份量，而且佢切得薄薄地，加上佢個幾清新開胃的醬汁，食落完全唔會覺得肥膩。燒白鱔! 正，燒到脆脆的白鱔皮之下係滑嫩的白鱔肉，白鱔自己本身獨有的魚鮮味加上白鱔的魚油一咬下去就隨之流出，再與脆卜卜的皮一起咀嚼，每一啖都係一種享受。個牛脷大大片都好正，厚薄都好適中，用了黑椒來燒，食落好香黑椒味，仲好有咬口。