酒鍋 (天文臺道) (已結業)

今晚約左班frd 打邊爐，店員推介我地食佢地halloween 餐，可以試下新出嘅嘩鬼鍋底，而且價錢都幾合理，又match 好哂配搭唔使左諗右諗。新派中式格調，地方好闊落，幾好坐。醬料好多選擇，有xo 醬同蔥油酥，非常香同惹味。嘩鬼鍋上枱大家真係嘩左一聲，原來係成個南瓜頭掉落去滾，有忌廉同茶樹菇，滾到好似南瓜蘑菇忌廉湯口味，攞黎做湯底真係好應節又夠特色。安格斯牛頸脊，好好好嫩滑嘅質感，牛味足，正和牛牛丸好爽好香濃牛味同好juicy, 絕對係驚喜作。紫菜響鈴好大舊，配酸甜汁，減油膩感。台式麻辣小鍋有臭豆腐，鴨血，花膠，麻辣度足，醬汁惹味，等水滾之前食一流。原本諗住魚皮係打邊爐食，原來就咁食仲正，因為係黃金魚皮，咸蛋蓉好香，魚皮鬆脆，一食就停唔到口。嘩鬼糯米糕夠哂應節，好似芝士南瓜湯丸嘅味道，做甜品不錯。呢間火鍋店唔太貴，每人食左400幾蚊，食物質素好，又有特色，環境好，坐得舒服，值得推介。