📍元朗教育路15-19號嘉城廣場地下G20-G21號舖
身為元朗友，經常捐窿捐罅搵好嘢食，無論係小食店、餐廳定外賣店我都好有興趣發掘。今次行開嘉城，發現後巷開咗一間主打韓式便當同小食嘅外賣小店。
店內廚房細細，有兩個bar檯位可以堂食，餐點價錢便宜，感覺親民。黃昏時候未諗到食咩晚餐，決定試一試佢！原來所有主食、小食同飲品都係即點即做，有心機小店值得支持！
想特別一提，兩位店主即使做到身水身汗都依然有傾有講，笑笑口，而且友善傾到計，仲分享跟韓國師傅學廚點滴，真係好有人情味！
1
[價錢 Price]
💰$45
韓式炒粉絲 🍲
辣豚肉 涼拌混菜(菠菜+芽菜) 溏心蛋
食韓國菜點可以唔食炒粉絲？Zoe嘅粉絲唔會太油，炒得夠乾身，每條都掛到醬汁。辣豚肉偏向韓式甜辣口味，豚肉肥瘦均勻，店主堅持自家調配所有醬汁，所以唔會太辣，反而幾開胃。
1
配菜涼拌菠菜同芽菜有清爽感，平衡到炒粉絲嘅油香，有正宗韓菜味道！自家製溏心蛋流心度啱啱好，充滿醬香，令整個便當變得更完整。
[價錢 Price]
💰$45
忌廉咖喱炒烏冬 🥘
喺餐廳食一個忌廉烏冬，無8、90蚊都落唔到樓，喺呢度半價就食到！佢嘅烏冬煙韌彈牙，咖喱味濃郁兼帶有香料嘅辛味，堂食唧埋滿滿嘅忌廉，真係非常好食！
1
配菜仲有大量新鮮蔬菜，例如洋蔥、翠玉瓜、香菇等，帶皮雞肉煎得好香口，肉質保持滑溜，份量十足！
為咗保持食物質素，外賣嘅咖喱炒烏冬會分裝液體忌廉，雖然無唧花咁靚，但味道一樣好味，令我喺兩星期內回購咗兩次，真心大推！
[價錢 Price]
💰$20
泡菜煎餅 🫓
煎餅麵糊又係自家製，即場食外脆內軟，泡菜酸辣味突出，呢個價錢嚟講，當小食都幾抵玩！
[價錢 Price]
💰$30
芝士蟹籽蛋卷 🧀🥚
師傅好工架，蛋卷滑溜，裡面包住流心芝士，仲有啖啖蟹籽，層次感十足，食落唔會太膩。外賣店都有咁嘅質素，好有驚喜！
1
[價錢 Price]
💰$20 (跟餐+$15)
黑糖珍珠奶茶 🧋
黑糖味香濃，唔會死甜，奶茶質感偏厚。珍珠煙韌度唔會好硬，加十幾蚊就有大大杯，平過手搖多多聲！
1
[價錢 Price]
💰$14 (跟餐 +$7)
手打檸檬茶 🍋
檸檬茶清新解膩，酸澀度平均，加埋香水檸檬一齊暴打，最啱配偏濃味嘅韓食！
1
