串Grill 自助燒烤專門店 (譽發廣場) (已結業)

燒烤場終於開返，個個都開始約郊遊加BBQ，不過又要起爐又要備料，放假想懶啲但又有BBQ癮？自助轉轉燒就最啱，今次去咗旺角譽發樓上一間自助燒烤專門店。舖頭入面全部都係卡位，坐得舒服，環境尚算整潔，每個位會放備一張搞鬼濕紙巾。落單係scan QR code點食物，之後就會由店員送到客人架上，飲品就可以係場中間嘅雪櫃自取。肉類方面，有齊雞牛羊豬任君選擇，牛肉就有和牛牛柳、西冷、牛肋腩等共四款選擇，豬同雞都各有四款，其中厚切牛舌、西冷、豬肉眼、豬五花尤其出色！海鮮有蜆、鯖魚、多春魚，串起嘅蜆肉慢慢燒到收乾，入口鮮味十足。丸類同腸類都幾多款式，有墨魚丸、貢丸、魚蛋、蝦卷等等，必點魚肉年糕、台灣腸！蔬菜類都幾多選擇，包括蕃茄仔、秋葵、菠蘿、翠肉瓜、雞髀菇等等，菠蘿香甜多汁。另外仲有新鮮爽脆嘅生菜，可以夾住烤肉食！甜品有棉花糖同雞蛋仔，烤熱再夾埋一齊食超正！總括嚟講，雖然無其他熟食、沙律等食品供應，但串grill嘅串燒質素幾高，啱曬想舒舒服服食高質串燒嘅懶人們！