當然要食佢既招牌「麻辣大紅鍋」！選用左重慶最辣既「朝天紅」、茂汶大紅袍同埋金陽青花椒，再加入石柱辣椒、郫縣豆瓣等等十幾種香料，一定要試下！墊枱紙都有介紹餐廳以及食既方法
1
都有圍裙供應，唔怕彈污糟件衫
所有野未到之際，店員會先上雪耳紅棗糖水，先上糖水係比較少見既做法，可能要為挑戰辣打定個底先
湯底以人頭收費 $38/位我揀左鴛鴦鍋，鴛鴦固定一隻係「麻辣大紅鍋」，另一隻就自己揀，我地揀左「特色香果鍋」，用上蘋果雪莉做鍋底。另外，醬料及茶水$20/位，再另加一服務費。
1
「麻辣大紅鍋」揀左普通辣，怕太辣試唔真佢既麻、辣、香，一上枱超級紅當當，聞落去已經有啲攻鼻，一呷，帶股肉羶味，先辣後麻，最後又帶點甜，好多重既味道，點解咁紅，唔係冇原因！而「特色香果鍋」以為咁清會冇乜味？錯啦！估唔到蘋果雪莉都可以清得黎咁入味！每款食物都會沾上蘋果雪莉既味道，食下辣，想抖下果陣食清少少清下個口再食辣，好完美
而配料方面嗌左6樣，全部都有1份或者半份可選，首先有火鍋既好拍檔牛肉！
美國安格斯優質肥牛 $198/份
點餐紙上每款都有教你烚既時間要幾耐，肥牛只需5-10秒。可以見到每塊條紋清晰，而且顏色夠紅潤光澤，都算厚身，肉質嫩，索哂啲辣汁，必點！
稻田毛肚 $108/份
必點！用冰鎮上枱，毛肚只需烚15秒，每塊都又薄身又大塊，食落爽脆又有嚼勁，又索到麻辣湯底
重慶耗兒魚 $78/份
食魚最怕又「鞋」又多骨，自己未食過耗兒魚都怕，但網上見好評甚多，一於試下，果然冇介紹錯。耗兒魚需要長少少時間10分鐘，骨肉容易分離，但又唔會係湯入面散哂，魚吸到哂湯既精華，如放在辣湯，入口會先係甜味！
鮮黃喉 $98/份
黃喉即係豬心管，真係又係好少會食到既一樣火鍋配料。烚2分鐘就可以食，超級爽脆！食落硬硬地但又好易咬得開，打邊爐食真係一流
曉宇苕粉 $48/份
打邊爐點可以唔食啲麵/粉類既食物，苕粉係紅苕既粉條製品(紅苕又名紅薯)。每條都好寬身，烚5分鐘等佢焾哂就食到，好煙韌，QQ彈牙既口感，無論放咩湯底都好食。
紅糖糍粑 $68/份
紅糖糍粑係漢族既甜點，呢個可以即食亦可以放入鍋烚一陣再食，我中意就咁食，條條都炸到金黃色，外脆內軟粘，配上紅糖汁，煙韌得黎又唔會太硬，而且紅糖汁有畫龍點睛既效果。放入鍋到就好似烚年榚咁，口感更軟糯，入口冇咩味，但愈較愈滲出辣汁，都幾得意，但我覺得就咁食更滋味。
洛神花茶 $18/杯
以為係淡淡花香，原來飲落似酸梅湯咁，我自己不嬲好討厭酸梅湯，呢個唔岩我口味……
可能自己偏好食落辣，而且都真係可以食到比較辣既程度，所以對四川、重慶菜等有一種情意結
，今次好滿意，食得好盡興，全部食物都好岩我胃口(飲品另談，自己嗌錯)，而且店員服務都好好，不停會自動加茶加水，絕對係一間我會再黎既有高質素火鍋店(前提要有人同我咁食得辣)！（P.S.好少打私人感情係食評到，但好想講下，由於身邊冇咩朋友食辣既程度同我一樣，今次食呢間店令我想起剛剛分開不久既前度，佢同我口味十分相似，比我更食得辣！直程好似四川、重慶人咁食得辣，假如同佢黎食，可以食中辣，大家一定食得好開心……不過唔知仲有冇呢個機會lu）
