八哥主題餐廳 (已結業)

而家比較常見連鎖餐廳cross over其他品牌出主題餐單，真真正正嘅主題餐廳愈嚟愈少見。呢間餐廳以八哥做主題，雖然冇真狗仔駐場，但舖內周圍都畀佢「霸晒地盤」，有唔少單身狗公仔陪你食飯。午市免加一，最平嘅set只係$58，喺尖沙咀絕對係茶記價錢，cafe質素，幾抵。但嚟得主題餐廳當然想試啲特色嘢，叫咗個軟殼蟹牛油果蟹籽漢堡。漢堡大大個而且漲卜卜，啲蟹腳踢晒出嚟，打卡一流！入面相當足料，有大量蟹籽同牛油果醬。一啖咬落去包面少少脆，幾香牛油味，牛油果醬同沙律醬加埋係雙重咁rich。蟹大隻啖啖肉，雖然打卡重要，但天氣開始凍，炸蟹要趁熱食，如果唔係會食到油味。薯條粗身又大條，炸得乾爽香脆，而且仲留咗啲皮，特別香。甜品高質！擺盤靚得嚟仲有少少聖誕氣氛。雪糕幾有驚喜，並唔係常見供應商出品，而係芒果味幾真嘅雪葩。蘋果金寶果肉大粒，酸酸甜甜食完好開心。不過餅乾控嘅我當然想面頭多啲脆脆啦，因為呢度用咗冇批底嘅做法，會唔夠喉~餐飲冇加錢，只係汽水，但狗頭杯已經夠你打一輪卡喇~