泰傳奇 (已結業)

上星期去九龍灣Emax國際展貿中心睇完戲然後去左商場二樓新店“泰傳奇”食飯，估唔到非常有驚喜，餐廳裝修雖然平平無奇，但餐廳老闆甚至店員十分親切，向客人介紹菜式，就著客人口味推介餸菜，而且廚師為泰國師傅，完全正宗泰式風味，食品有水準。首先離一個椰汁雞湯，因為我地唔食得辣，所以點選左椰汁雞湯，香濃既椰汁雞湯充滿雞肉及雜菌，濃郁既湯微辣得恰到好處，湯餡料既份量十分多。跟住頭盤點左柚子沙律，大蝦爽口彈牙，柚子肉新鮮多汁，十分開胃。而主菜泰式豬頸肉班蘭粉，湯底超級好味，感覺帶點甜味既湯底配合班蘭粉，絕對要一試，而且豬頸肉爽口有咬口，超讚。另一個主菜海南雞配油飯，海南雞肥瘦適中，雞肉嫩滑，連雞胸部份都一樣嫩滑，值得讚賞。而小食係肉碎生菜包，用新鮮既生菜包住肉碎，生菜清新口感中和肉碎既微辣，非常好味。而最後飲品點左椰青及珍多冰，椰青水清新好味，珍多冰既椰汁又香又濃，完美既一餐泰國菜。