港麵子 (已結業)

星期日晚飯時間，舖入面坐咗一半人都冇。枱面果樽要收5蚊嘅水到底想點呢？佢地又有水供應架喎，當然你唔叫又唔會斟比你啦。不過放心，冇收加一服務費嘅。叫咗個椰香掛湯海鮮喇沙，問個侍應有冇得少麵，佢勁驚訝，唔想嘥野啫，有幾出奇。講返碗麵，麵質幾彈牙，堅有椰香，堅掛湯（呢個難，好多舖頭都係得個吹字），堅係喇沙而唔會勁鹹，令人好想飲晒啲湯。佢有五粒豆卜係令人感動嘅，有啲舖頭比得兩三粒，豆卜先係喇沙嘅精華嘛大佬！不過，問題就出喺啲海鮮度，有蝦、蜆肉、魷魚圈，都算足料，起碼冇比蟹柳厄我。我冇咁叻，食唔出啲海鮮係唔係全部雪藏貨，但肉質ok，冇霉，冇雪味，唔只，係一啲味都冇，同碗喇沙完全係兩樣野咁。但鬼叫碗野88蚊，真係死都要啃晒佢。