之前同事散水餅買咗「啖啖燕窩」嘅出品，大家一致讚好，所以呢日去開觀塘就特意上門市睇吓，因為母親大人生日，買啲嘢送畀佢嘛💕。
小店門市地址位於觀塘工廈，不過位置都易搵，而且指示好清晰，唔使搭𨋢，行一層樓梯就到👍，走廊沿途都貼滿佢嘅宣傳介紹。
估唔到入到店內，環境更係哇一聲😳，裝修好靚，少女味極濃，四周圍都係打卡位。雖然呢度係零售店，但都有幾張枱供堂食。
我揀好買乜之後，店員好快就幫我Pack入袋，個袋設計好靚，而且又保溫🥡。
麻辣鮮鮑魚($188/樽)，鮑魚醃咗喺麻辣汁之中🌶，醬汁辣得嚟唔過火，麻味顯著，我哋食晒啲鮑魚之後，呀媽仲留低咗個汁自己再整多次嘢食。一樽鮑魚有六隻，尺寸都唔細，而且炆得好軟稔，一啲都唔韌，老人家都啱食。
衰仔雞翼尖($48/包)，雞翼尖大大包，🍗一包有成三四十隻，一次過食唔晒，送飯或宵夜食都得。雞翼尖滷得好入味，蒜香突出之餘，仲帶啲酒香同微微辣，好惹味。
鹽焗味慢煮雞胸肉($28/包)，🐔我學人減肥試吓食雞胸，大啖肉係爽嘅，而且放熱水浸一陣就食得，好方便。雖然話係雞胸，不過肉質完全唔嚡，但鹽焗味較淡，可能黑椒味會好啲。
冰糖紅棗杞子雪燕飲($58/枝)，本身有諗過買燕窩，但係比較貴🙈，所以轉戰咗平民版嘅雪燕飲。雪燕飲有多款口味揀，我揀咗紅棗杞子❤️，絕對係女士滋補恩物。糖水清潤唔太甜，而且雪燕份量激多，每啖都飲得到。
特濃4.3牛乳燉蛋($38碗/$18樽)，🥚燉蛋看似平平無奇，不過味道同樣出色。燉蛋凍食或熱食都得，蛋味非常濃郁，再加埋牛乳🥛，質感杰得嚟仍能保持細滑，甜度亦適中。燉蛋有兩個Size，樽仔嗰個我即刻食，碗裝就拎返去同屋企人分享。
總括嚟講，啖啖燕窩嘅出品好正😋，鹹嘅食物惹味，而甜品就好滋潤，連呀媽都表示滿意。商户另外其實仲有燉湯同花膠等，全部都係養生食品。我一定會再幫襯，下次約埋朋友夾單買夠錢，就可以網上買免運費。
