小火焰韓式咖啡廳 (金山樓) (已結業)

大圍呢十幾年起左唔少新樓，但係近大圍東鐵站附近又還未有興建大型商場，所以附近既街道就開滿食肆，中西日韓，總會搵到你想食的。今次去嘅呢間小火焰韓式咖啡廳，入面又真係比一般韓食餐廳多好多甜品，有好幾種既雪花冰，可惜今次因為太飽無試到。講返今日食嘅個兩樣主食，第一款係香芒炸雞沙律，呢個沙律好啱想食炸雞但又唔想太飽，同埋芒果同炸雞係好好既配搭，芒果既酸甜混合炸雞嘅辣，將味道帶上另一層次。另一個主食係牛肉石鍋飯，呢一款係我鍾意嘅韓食之一，因為熱辣辣嘅石鍋飯混合韓式辣醬，即時開胃。雖然無食到甜品，但都叫咗杯蜂蜜紅棗茶。下次再嚟就想試吓水冷麵，但係呢間餐廳嘅份量都幾多，最好一班朋友一齊嚟，先可以試多幾樣。