蒲田日本料理 (已結業)

呢間日本料理由我第一日係灣仔返工已經有，不過今次係三年黎第一次食。本身其實想食返佢隔離既魚鮮生，但係佢執左，所以就試左呢間。入到去個環境好黑，不過佢啲燈幾有日本feel，幾特別。加拿大海膽同三文魚腩刺身，海膽有少少沙，不過都幾鮮甜。而三文魚腩刺身都幾肥美，不錯。牛肉烏冬，湯底無乜味，烏冬煮得太腍，普通牛肉，無乜特別。雞泡魚乾又係無乜特別，唔係太好食。燒豬頸肉，無乜味同埋個豬頸肉唔太新鮮。天婦羅拉麵，都係好普通。天婦羅炸得多油左少少，拉麵湯底就普通豬骨湯，拉麵硬度煮得幾好。鰻魚卷，個汁都幾好既，不過又係唔算好好食。劍魚腩壽司、帆立貝壽、甜蝦壽司，呢三款都幾鮮甜既，但係又唔係好好味，可能因為雪得過凍。火炙三文魚壽司，呢個食落反而幾好食，好肥美，少少入口即溶咁既感覺。火炙左口魚邊壽司，呢個好味！入口即溶，好香甜。馬糞軍艦，比起加拿大海膽更香甜。