品越越式料理 (士丹利街) (已結業)

午飯時間喺中環搵食絶對唔係一件易事， 無特別目標只從士丹利街頭開始行，見品越有set lunch而前面有一班人故急急腳沿長長樓梯上去攞位，好彩行先一步剛好仲有兩個位。 Set Lunch有多款有飯、湯粉、撈檬、炒飯麵，沙律，等等配有餐茶，約六十多元一款。蕃茄蟹肉湯檬粉 （$62） - 上枱時見到色彩鮮豔湯檬即刻食慾大增，未食已聞到鮮甜湯味。蕃茄頗多初時以為會濃酸味，但又無喎主要係蕃茄同蝦蟹類鮮味仲有好多肉碎，有幾個蛋球有啲似魚腐質感混入不同餡料。整體豐富，越食越滋味。扎肉蝦餅撈檬 （$62） - 同樣非常吸引，蝦餅大大槐食得出蝦成份足，扎肉有三片如果煎過會好味啲，除檬粉外仲有大量菜絲同醃酸蘿蔔，加埋檬汁撈均一齊食有肉嘅鮮味又有菜嘅清新，混合不同口感。餐茶亦絶唔媽乎，奶茶夠熱茶味香濃，而凍檸茶同樣茶味足配夾檸檬味。要一讚，餐廳雖然午市多人等侯，但對客人招呼仍然周到，唔會漏單或摧趕食客。