Noodies (已結業)

下晝教完水喺西營盤搵食，本身想食阿元來了，點知遇著禮拜一休息。無得食就去左對面一間算新開既鋪頭，睇個名知係食麵，但唔知係車仔麵，諗住是但食碗麵填飽個肚就算，不過佢又唔係好傳統嗰啲，望落似係新派野。入到去雖然係細細間，有12-3個位，但感覺唔會太迫，似係食拉麵嗰啲size。坐低聽到後面話個生菜包好鹹，心諗乜食麵有生菜包賣咁多元化?! 30蚊，唔算貴，西區啲租都唔算平，所以okay啦，但係原來下午茶包埋野飲29蚊，可惜下午茶淨係由3點至5點，比較短，所以無試到，希望可以長少少時間啦。碗冬蔭功手撕雞雲吞上海麵其實幾好食，冬蔭功夠辣微酸，我算食得辣就覺得好正，份量唔算少，個麵都幾大個，夠一個男士食有多喇。雞都幾滑，同埋都幾多，雲吞就正常啦。飲野方面，加9蚊有罐裝，唔算平，不過有罕見既楊協成，都幾特別。睇埋其他餸，唔算多野揀，但基本既都有，有啲特別啲要加5蚊，下次可以試多啲其他野食，或者試下個生菜包係咪真係好鹹先。anyway, 都值得黎食多次既。