檳城餐廳 (已結業)

今日祭祖過後去咗呢間餐廳食飯，我哋一行十一人（連埋手抱bb同bb車）入去餐廳食午餐。當時店內唔算繁忙。落單係由一個戴黑色粗框眼鏡嘅年輕男侍應負責。呢位侍應落單時語氣麻麻，有少少悔氣，初時都不以為意，覺得可能每人講嘢方式都唔一樣。之後問該位男侍應要個細碗食飯，叫咗佢三次都無應，直行直過，最後就唯有用同枱嘅人個湯碗食飯。用餐期間又聽到該位男侍應朝另一枱客人喝罵，當時果枱客人見餐廳有二人枱，佢又只得兩個人，所以想從被安排嘅四人枱轉去二人枱，就對該位男侍應詢問可唔可以轉枱，結果換來一句大聲嘅「你等等先啦！」令人愕然。之後臨走，同枱有兩位大人（連手抱嬰兒同bb車）先起身打算行出門口，喺路口企咗喺度講咗一陣嘢（約一分鐘）。當時無為意到該位男侍應捧住餐企咗喺後面，然後該位男侍應就向住兩位大人（有手抱bb）態度惡劣地講話佢「阻住曬！唔使行呀？」當時我哋立即反駁「你要行我唔使行呀？你唔想做咪唔好做囉！咁講嘢都得嘅？」該位男侍應就無再回應。埋單時，隨口問下收銀員，原來該位男侍應並唔係經常返工，有好多嘢都唔熟手。但唔熟手唔代表可以態度惡劣囉。唔知重以為自己去咗澳牛。真心佢唔想做服務業重有好多其他行業可以揀。