新川美食 (已結業)

果日口淡淡，好想食一碗粉，咁啱行過見到哩間新川美食，好似記得係ig有人推薦過就行左入去鋪頭唔算大，但都有起碼五張台既。成間鋪得一個阿姐落單同送野食。落左單冇幾耐，order既秘製醬汁撈薯粉條就係我面前啦！首先，睇個賣相，就知有花生、炸醬、芫茜、蔥等配料，但其實食落仲有少少酸菜，但因為實在太少，見唔到薯粉份量其實都唔少既，撈勻左之後味道幾夾，叫左少辣，但唔係太辣，會想一啖接一啖咁食曬佢。薯粉我中意食煙韌得黎又唔會太難咬既，哩到既薯粉唔會太軟，但黎煙韌可能仲差少少，如果再煮少一陣，就完美啦！配料方面，炸醬既份量算幾慷慨，又幾好食；花生夠脆，但未至於食完頂胃。撈粉最最怕就係一滴水都冇，成件事乾爭爭，哩碗薯粉底有少量水，撈完之後薯粉有濕潤既感覺，幾好。之前食薯粉會好飽濟、頂住頂住咁，所以我都好耐冇食，但哩碗食完未至於勁濟，收貨啦！