泓一拉麵 (已結業)

事隔半年再黎到呢間係大圍既拉麵鋪。記得呢到既沾麵同叉燒都有一定水準，估唔到今次既食物質素同服務態度都令人大失所望、怒火中燒。我地6點開鋪入去做第一批客人，女待應掛住玩電話落單過左10分鐘先記得比兩杯杯水我地，等左20分鐘終於有野食，今次叫左黑蒜沾麵。本來滿心期待，但食落真係同想像有好大落差，比之前退步左好多。個湯得個鹹字，一啲魚介/豚骨既香味都無，鳴門卷依舊難食，只有蛋同叉燒保持到水準。難食都唔係問題，當我同侍應提出話個湯好咸，可唔可以加啲魚湯既時候，佢竟然一面驚訝話：「沾麵黎架啵？唔鹹點叫做沾麵啊？」對唔住，其實全港既沾麵我都食過曬，再難食既我都試過，但咁唔尊重客人既鋪頭真係第一次見。沾麵係要濃，但唔係得個鹹字，如果呢個係你地既新特色，希望你既客人之後唔會腎衰竭。