一鍋堂 (XX Arcade) (已結業)

朋友約呢度食火鍋放題，餐廳幾大，連調味架都乾淨企理，飲品又多選擇，抵讚。我哋要最豐富嘅C餐、胡椒豬肚湯底，嗱嗱臨二維碼自己落單。十幾種牛、豬、羊肉，每樣都試，再加少少海鮮、素菜，留肚食雪糕。個湯好足料，有好多豬肚，胡椒味可以再重啲。咁多種牛肉，真係唔識分，大部分都幾好味。最鍾意日本產黑毛和牛，覺得最有牛肉香、肉色同油花最靚，我哋仲encore𠻹！魔鬼辣安格斯牛肉，醃得好夠香辣惹味，但一放落鍋，連湯底都辣埋，可以遲啲先放。牛脷心托帶點靭，覺得一般般。其實自己鍾意食海鮮多過牛肉，佢嘅蝦真係冇得頂，好鮮甜。蜆都唔錯，吐沙算吐得乾淨。最開心係有白鱔片，又肥又爽脆，朋友唔食，自己一個食晒，哈哈。鴨血嘅口感唔錯，但應該早啲落鍋，等佢多啲時間吸收湯底精華。放題限時兩個鐘，睇準時間，趕得切食士多啤梨乳酪雪糕！圓滿！店內poster話會員感謝祭，九點後叫C餐可任飲生啤同坐三個半鐘，下次睇完戲過嚟都好喎。