紅磡串門子 (已搬遷) 新店位置

台灣風格，好有穿越感，明明喺香港，感覺好似飛咗去台灣（可能係舖頭loop緊周杰倫啲歌嘅關係）。舖頭唔大，但人唔算多所以唔覺得逼夾。環境安靜，適合三五知己聚餐傾偈(隔離枱）。食材好新鮮 , 味道都好啱我嘅路線 , 撈丁 、 加工肉類味道一流。尤其係個雙重芝士撈丁，撈咗少少辣汁再加大量芝士，拉絲效果非常過癮。本來打算再叫多份，但太邪惡，罪惡感叫停咗我。惹味小饅頭都係一個特別嘅菜式。將饅頭對半切開，再沾滿特別調配嘅燒烤粉，燒到微焦，食落有法式麵包嘅硬外表，內𥚃依然係軟熟白饅頭。最後嚟返個甜品，燒棉花糖夾餅。初頭睇menu，以為係雞蛋仔舖嗰種夾餅（格仔餅），點知原來係夾梳打餅。 要趁熱食，如果唔係會好黐牙。值得讚賞嘅地方: 可能係因為疫情，每台之間都隔住好遠嘅安全距離，出餐速度亦都好快。服務員只有一兩個，有時候會好忙,但態度都OK嘅。一份單品大概30蚊樓下左右, 唔貴。