烏蠅館 (已搬遷) 新店位置

假日同hony 行完九龍公園後經海防道，係間大型化粧店側條梯級上亞士厘道搵嘢食，見有間店舖個名好奇怪叫烏蠅館，喺好奇心驅使下，自己又鐘意食車仔麪咁就上去試試。就喺天星大廈一樓，入到去見兩幅牆上掛咗多種唔同款式嘅茶杯同舊茶餅擺設。雖然已高朋滿座但坐位總算唔會逼夾。餸菜有幾拾款咁多，有A至D餐可以揀六至八款餸菜，其中B餐仲照顧到鍾意食素菜者，另有加料嘅二人餐。 我哋今次一人叫咗一個C餐,各人可以揀八樣餸,估唔到一上枱唔止睇落好吸引,鋪滿好多蒜蓉、芫荽蔥，濃香撲鼻；一碗湯底要咗少辣，飲落確係別有滋味，湯底原來係由一位60年代嘅陳師傅秘製而成，餸菜樣樣都醃得入味😋。自家製特飲有八款；揀咗玫瑰蜜同苿莉蜜，甜度適中，香氣芬芳👍。老闆仲話新嘅一年開始，晚上加推火鍋，到時一定不容錯過要再嚟品嚐鎮店名湯。