風雲丸

营业中

休息中

之前同朋友行過風雲丸，覺得佢嘅外面好吸睛好有日本風，而朋友話哩間拉麵平時好多人排隊，於是今日咁岩喺尖沙咀，就入去試一試有幾好味。由於今日冇時間食lunch，餓到差不多5:15先有機會去食個麵，於是我就膽粗粗叫咗個䐁骨魚介味玉沾麵，仲要叫左個特盛size（有 400g嘅麵）。因為之前冇食過所以唔知道究竟唔同size嘅麵有幾多，今日試過之後真係好想講，千祈唔好咁貪心🤣，因為”特盛”真係好大碗。如果正常一個女仔嘅食量，”大盛”已經食到好飽！由於我叫咗又唔想浪費，所以迫於無奈都要食晒成碗麵，好彩我一向都係橡根肚，咁大碗都難唔到我。講返碗麵，其實麵質有啲似烏冬，而塊叉燒，肥嘅部份好肥，瘦嘅部份好瘦，係冇中間嘅！所以肥嘅部份一定要同麵一齊食，如果唔係就好膩。至於個湯底果然係精華所在，本身都好掛麵，食完之後我叫侍應加啲清湯再飲，真係弊傢火，湯有魚嘅味道，好飲到唔停得口，食咗咁大碗麵都仲可以飲到咁多湯，證明個湯真係唔簡單！