泉章居 (已結業)

上星期友人相約黎呢間飯店食晚飯, 其實呢間食店好出名, 但係師傅真係好少黎呢度, 所以都幾期待! 好唔容易先等齊班遲到友, 而d都黎得七七八八, 叫左有冬瓜盅, 椒鹽豆腐, 梅菜扣肉, 霸王雞, 炸大腸, 黑椒牛仔骨, 西檸煎軟鴨, 蟹肉扒西蘭花, 芥菜膽, 什菜煲, 蒸倉魚, 同埋例湯!冬瓜盅個湯好清, 冇味精, 而瓜都好嫩, 幾好; 椒鹽豆腐冇咩味, 不過豆腐唔硬唔乾身, 可以啦; 梅菜扣肉係一道十分唔健康, 偏偏係師傅最鍾意食, 梅菜好香而且唔算太咸, 扣肉就最得, 半肥瘦好, 送飯一流, 可惜唔能夠食得太多; 霸王雞又係得, 肥雞一隻但雞身好滑, 一d都唔韌; 炸大腸炸得好脆好乾身, 十分香口; 黑椒牛仔骨就好腍好鬆, 黑椒香而不辣; 西檸煎軟鴨西檸汁酸酸地好醒胃, 但又唔會酸得濟, 鴨身煎得好乾身, 一d都唔肥, 送飯又係一流; 蟹肉扒西蘭花蟹肉都算多而西蘭花又嫩又新鮮, 而且好爽口, 正呀; 芥菜膽師傅冇食; 什菜煲就好多粉絲, 不過不失啦; 蒸倉魚蒸得唔腥, 而魚身唔鞋, 都算滑以倉魚黎講收貨架喇!總括黎講呢度食物真係唔差, 招牌菜特別出色, 但其他菜就一般啦, 冇咩驚喜