御滿屋日本料理

营业中

休息中

收工收夜左，於是乎同同事諗下食咩好，中日韓泰，咩都諗左，最後大家一致共識，好耐無食日式料理放題，所以就係網上做下research，搵到呢間『御滿屋』，八點半後入座，最平都係$258，而且有77款美食可以揀，但其實都包晒大家想食日式美食。一開波揀係試下佢刺身先，估唔到有驚喜，因為佢種類選擇都多，仲要有我至愛帶子同甜蝦。食落新鮮，無乜雪味！另外，呢度燒物同天婦羅，好抵讚，燒物夠惹味，而天婦羅選用材料夠新鮮，我尤其中意佢個南瓜，粉唔會太厚，炸得香脆，個南瓜食落又幾甜，所以每次order ，我都會必落天婦羅。仲有值得一提係一品料理，見佢上避風塘炒蟹、清酒煮蜆、鮑汁燴花膠，仲見到有蒸氣，最重要係蟹肉食落唔鬆散，係啖啖肉，同埋個醬汁惹味。如果唔想等，佢收銀機附近放左好多前菜、炸物、熱盤、甜品，選擇都好多。飲品咩都有，汽水、茶、清酒、梅酒都應有盡有。最後，就梗係點埋點佢一人一杯雪糕，有Häagen-Dazs同埋Movenpick可以揀。最估唔到Häagen-Dazs有最新口味開心果可以食。呢一餐相當滿意，性價比非常高。