スーパー丼 (駱克道) (已結業)

夜晚喺銅鑼灣搵嘢食，見到呢間未試過走入去試吓，點知中伏，下次唔會再幫襯。一入到餐廳，環境比較狹窄，好在已經過咗晚飯高峰時段，店內唔係太多客人。見到食物相都好吸引，先上和牛鵝肝丼，和牛好軟冧好好味，令人有驚喜。鵝肝都OK，但係白飯就麻麻哋，配菜有生洋蔥沙律菜仲有鹹酸菜，唔係太夾，可能唔啱我口味。另外叫咗咖喱豬扒飯，首先啲咖喱汁太少唔夠撈飯，另外啲豬扒炸得太爛，一夾就散晒，味道認真麻麻地，$88呢個價錢認真唔值，最後都食唔落。去到食完飯，其實都冇比過茶我哋，無茶都冇所謂嘅，戴好口罩準備走，侍應先即刻沖杯茶嚟，本身都準備走，冇飲到啦。食嘢期間會見有2隻蚊滋喺度飛舞，同埋聽到餐廳主管耐唔耐就會教訓下員工。總結來講，餐廳環境服務都麻麻哋，淨係和牛令我有驚喜。