Catee (已結業)

餐廳環境比較昏暗都幾有feel，用嘅餐具佈置都幾有格調，六點去到餐廳時一個人都冇，環境都比較幽靜，因為無咩客人，一開始仲驚有少少中伏，但都食完晒離開過一刻，餐廳已經坐到滿晒人啦，好多人都一班朋友黎聚餐，氣氛又變得好熱鬧！！跟餐加＄50嘅沙律同埋餐湯，沙律係藜麥沙律，藜麥係一種好健康既食材，配埋酸酸地嘅沙律汁，好開胃。 跟餐送嘅餐包，配埋黑醋汁點吓點吓好返食晒。餐湯係薯仔湯，薯仔湯口感綿密，飲得出真材實料。另外跟餐加左＄20叫咗龍蝦湯，比較滑身同濃味，＄20抵比啊！第一個主菜係大蝦冬陰公意大利飯，大蝦用牛油煎過，好香，意大利飯比較硬身又索滿冬陰公嘅汁，酸酸地又唔會太辣，泰式香料味都好突出，好味！第二個主菜係烤紐西蘭羊架伴薄荷乳酪（五成熟），伴碟有秋葵、薯蓉、番茄仔，羊架有羊臊味，唔會太嚡口，正！薄荷乳酪汁酸酸地可以減低左羊架嘅油膩感。甜品係紅豆綠茶蛋糕， 頂果層係紅豆慕絲，之後係綠茶慕絲，最底個層係綠茶蛋糕，個甜品唔會太甜太膩，啱我！最後媽媽食到太飽啦，餐飲都冇叫，我就叫左一杯茉莉花茶，清一清食到好飽嘅肚。