勝八居酒屋 (已結業)

呢晚同朋友一行三人嚟食日本菜，餐廳環境帶點日本風，好似置身日本當中。蕃茄沙律好清新，多汁甜美既蕃茄片連埋香口既芝麻醬，好開胃！刺身拼盤超豐富！大大隻既牡丹蝦同帶子最正！又嫩滑又鮮甜，回味無窮！油甘魚肥美，入口即融。魚肝好少見，幾香口，但多食會膩。牛油果軟殻蟹卷牛油果又香又滑，中間既軟殻蟹幾香脆，一軟一脆，好夾！另一款卷物系帶子鵝肝卷。鵝肝好惹味，連埋壽司飯一齊食，唔會膩，但就同帶子唔太夾，蓋左帶子既鮮甜味。呢個時候嚟左個火爐，我心諗搞邊科？原來系吉列和牛！將炸過但裏面依然粉嫩既和牛放上爐微微燒一燒，沾一沾沙律醬，就食得啦！和牛外層少少脆，食落稔滑而且好有牛鮮味，好正！跟住就食左啲燒物。明太子雞翼中間包住明太子，辣辣地好惹味，而且啖啖肉，食得超滿足！牛舌厚厚既一片，食落爽口，鮮味而唔腥，唔太鍾意食牛舌既我都覺得唔錯！食左咁多肉，系時候食返啲菜解下膩。青椒仔燒得好juicy又夠清甜，簡單又好食。最後一邊傾計一邊食下小食。味淋魚干味道似魷魚，帶少少油潤，好惹味，但就咸左啲。炸白飯魚好特別，連埋紫菜好脆好香口！最後用一球簡單既豆腐雪糕作結，淡淡豆腐香甜，滿足！今餐一邊食一邊傾，食得好滿足！