Lagom Kaffe (已結業)

星期日夜晚七點度本身想去另一間食，不過要等位，就打電話去呢間睇吓仲有冇位，好彩都仲有，就嚟咗呢度試吓。可能個位比較偏僻，所以客都少啲，同埋開咗一段時間熱潮過咗？地方大夠寬敞，都仲有好幾張吉枱。晚市有晚市menu，三文治all day breakfast 嗰啲都冇，係得幾款小食，燉飯，千層麵，漢堡咁。我哋兩個人叫咗個烤豬肉沙律，牛肉漢堡，同一個燉飯。一開始送咗兩款麵包，應該係自家製？好好食，暖暖地，佢有有香料嘅牛油配，不過我冇點都好食。跟住先嚟沙律，沙律菜正常新鮮，又唔會好多醬，清清地幾好，可惜個烤豬肉就唔係好得，好肥膩，我寧願要烤雞或者煙三文魚咁。跟住嚟個燉飯就意大利飯咁，八爪魚腳煮得夠淋唔會咬唔開，跟住煙三文魚就幾粒碎碎地咁，個汁係忌廉明太子，正正常常。最後嚟個漢堡，好就係都配咗唔少沙律菜，感覺比較健康，但主角舊漢堡就真係好唔得，完全冇肉味，淨係得個口感，非常失望。總括嚟講，味道質素真係好一般，不過叫做算好坐，如果喺觀塘真係可以有其他更好選擇。