但風雲丸開張時有大量報導介紹,香港人習慣一定係一窩蜂甘去排長龍。

過左2個月,每次經過都重係排到入轉角位。
餐廳設計透明大玻璃,座位有卡位,有吧枱,就算一個人黎食都唔怕尷尬。


今日大約8點黎到都轉到入報紙檔,但係入座速度算好快。
等左大約25分鐘就到了,但因為同行朋友未到,店員好貼心安排左我入店既等候位坐低等。
而且門口有茶可以飲,大家等得耐可以飲下茶解渴。

一早諗好左食招牌沾麵,睇到隔離枱既炸雞好吸引。
而且有個定律,拉麵店必點炸雞。


餐牌都好清晰,主打石鍋沾麵。溫度高達300度。


無論係主食定係小食都有好多款可以選擇,唔同口味,一定會有款岩。

落單依舊係要自己填寫,揀返岩自己既口味。
就係你點任何麵,可以揀埋麵既份量。並盛(200g),大盛(300g),特盛(400g)都唔洗額外再加錢架!
如果叫特盛,真係會夠2個女仔食。

今次就被安排坐左係吧枱位,但其實呢個位好岩我。
因為可以欣賞到煮麵既過程,會更加期待。

正宗拉麵店一定會附有凍水,而呢度更係檸檬水,食濃厚沾麵食到膩時可以飲返啖。
係等餐期間,發現左枱面有食沾麵教學。

如果之前未食過沾麵既朋友仔都可以睇下,簡單易明。

石燒濃厚豚骨魚介味玉沾麵($93)+香鬆飯($20)
睇落配麵係唔係好大,份量好多呢?
因為我叫左個特盛,2個女仔分
麵我就揀左冷,因為冷麵一定會比較彈牙,有咬口多啲。
事實證明,麵就甘食都好香麵味,可能你覺得我好似講緊廢話。
但係超彈牙既麵係咬下咬下就會Feel到架啦。

大大塊叉燒,燒到金黃,甚至有少少焦焦地
但係其實好軟,好lum,唔會乾好易咬開。
雞蛋好入味,但又唔咸,而且流心程度岩岩好。
重點!!!!啲麵真係好掛湯,如果100分滿分,我要比300分

一上枱時就聽到卜卜卜卜卜,熱辣辣既湯。
講到明話濃厚,一定要先飲一啖。
超厚身,但會有少少咸,所以配埋麵真係岩岩好,中和哂。
可以加少少檸檬汁,解下膩。但我覺得要食就唔好一開始就加,要食左佢本身既味道。
用左大量材料去煮既湯底真係精華所在。

香鬆飯($20)
聽講呢度好出名香鬆飯,睇落好似平平無奇。
只不過係有少少紫菜同日本調味料係上面。
甘就收我$20真係覺得唔抵,唔多想比。
但甘出名就一定要試下架啦,睇下點解賣到甘貴。

將飯加入剩下既湯。

攪拌到每粒飯都包滿湯。
食一啖,
原來係珍珠米,每一粒都好飽滿,好彈牙。好香甜飯味(又講廢話)
而且岩岩提到其實湯有少少咸,但拌左飯之後只會覺得好夠味,唔會咸。
而且石鍋幫助保溫,食得落既話真係必點。雖然有點兒貴,但都值既!

辛口唐揚炸雞($38)
唔好講笑,又一滿分炸雞
唔好講咩呀,5大塊炸雞都係$38,抵到爛啦。重有邊度搵到。
講返正題啦,新鮮炸起,夠哂熱!
一咬落去好多汁,好嫩滑。炸醬好薄,唔會有食粉既感覺。
想特別一提,如果唔係點食到辣既朋友就真係要諗下先啦。
因為我都算食得辣,平時最少都點中辣,但辣粉加辣油令我都覺得差不多係中辣,而且咬左一大啖粉真係要係甘飲水架!
食哂成碗麵再食雞,擺左甘耐重好熱,真係好好好抵讚!
總括黎講,風雲丸真係好值得再去!
