井上日本料理 (已結業)

今日唔知食乜好，行過見冇乜人咪入去食。上次同老公黎食都OK，但係今次出餐勁慢。三個人食三份午餐（牛柳粒定食，照燒雞扒定食，魚生飯）。好快就上左魚生飯，我地都明魚生應該會係快過熟食，所以一直都冇出聲。過多一陣店面開始越黎越多人，我地都冇怨言，繼續等，等到朋友仔連魚生飯都食完，我地仲係乜都冇得杯飲品。過左20分鐘終於忍唔住催單，侍應話幫我睇單，過左五分鐘d餐就到。咁點解之前等咁耐？另外我留意到出面有個女仔企起度等外賣等左好耐，一直問佢地得未都仲係要佢等。另外有客人入黎話佢嘅外賣係落錯單嘅要換，原來呢位客人同個女仔係識嘅就同個女仔講話不如食佢落錯單果盒飯，一樣都係牛肉，咪同侍應講話退錢。侍應淨係話已經煮緊，等多陣就有，直到兩女好企硬話要退錢先退。食完飯後唸住飲埋杯嘢就走，侍應就冇啦啦衝埋黎講，「喂，我幫你收左d嘢先。」未等我地反應就已經收晒d嘢。我都係飲埋杯嘢就交返張台比你，態度真係好差。隔離檯啱啱坐入黎就一支箭衝去講「喂，你地填好份落菜單未？」，人地話仲差一份，就即刻搶坐填好果份先。服務態度真係連茶餐廳都不如。