三分俗氣 (已結業)

今日去開新蒲崗行一田，行到天都黑，當然又係搵食嘅時候啦，知道區內有不少食肆，一定有好嘢食。係OpenRice見有間食上海菜的店舖，又見價錢相宜，就去一試。入內有設置卡位，地方都幾大，仲有電視 直播世界盃睇，正。坐下就叫了一個4人套餐（$498）有一個湯，兩個餐前涼菜，兩個小菜，一個炒飯/麵，一客小籠湯包，仲有甜品。真低食啦！湯叫了酸辣湯，材料有豬紅、木耳絲、肉絲、蛋絲、筍、豬肚絲，豆腐乾絲，非常足料。涼菜選了上海燻魚及四喜烤麩，兩款係上海菜的經典之作，好味。而小菜選了韮皇炒鱔糊，夠曬鑊氣，而另一款小菜選了咸肉津香，金華火腿唔會太咸，帶出津白的甜香，不錯之選。鮮肉小籠包皮薄肉汁四溢，肉味濃郁。最後選了上海粗炒，不會太多油，有冬菇絲，肉絲，菜絲，炒得幾乾身，味道恰到好處。當然要有甜品啦，豆沙窩餅皮酥脆，餡料足，唔會太甜，食兩三件都無問題。