雞皇 (已結業)

同朋友黎到九龍城搵好野食，發現有間食店新開。門口好光猛，係街口一眼就發現到佢。去到大門口，一開門已經聞到好香雞煲味😋一坐低店員建議我地先叫雞煲，可以趁熱食左d雞先，咁就唔怕一邊滾火鍋料滾到d雞肉變''鞋''。我地三個人order左半隻藥膳花雕雞煲同半隻麻辣干鍋雞煲(小辣）。花雕雞好足料，店員一打開煲蓋，真係勁香。雞件嫩滑，唔係果種肉質散開既無味雪雞，🐔雞味十足!而干鍋雞煲果然係招牌菜，連唔好食濃味野既我都忍唔住食左幾件。好惹味得黎又食唔出有味精，算係好難得👍🏻👍🏻👍🏻店員提議可以追加豬皮羅白落去一齊煮，食晒d雞再食配料。全部入晒味，無得輸呀真係!!!食到咁上下，店員幫我地加鮮雞湯黎打邊鑪。食完一隻雞已經飽左一半😂火鍋配料我叫左牛筋丸同流心芝士牛丸，牛味超濃👍🏻一份娃娃菜，分落兩個煲都滾🍲再黎一個稻庭烏冬做結尾，滑滑彈牙無粉味😋飲品方面，都算有唔少選擇既，好似有奶茶檸茶果d。見到雪櫃都幾款啤酒、白酒、汽酒同汽水，啤酒-我朋友就一定係支持日啤🍺Order左兩支，而我就飲呢到既熱茶🍵P.S:見到佢地宵夜時段做特價，下次叫多d朋友黎一次過試多d火鍋料